Gujarat Rain Weather Forecast Update : રાજ્યમાં વરસાદની ગતિ ધીમી પડી હોય તેવો માહોલ જોવા મળી રહ્યો છે. મંગળવારને 26 ઓગસ્ટના રોજ સવારના 6.00 થી સાંજના 6.00 વાગ્યા સુધીમાં 51 તાલુકામાં વરસાદ નોંધાયો છે. જેમાં સૌથી વધારે વલસાડના કપરાડામાં 2.05 ઇંચ વરસાદ વરસ્યો છે.
4 તાલુકામાં એક ઇંચથી વધારે વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં મંગળવારને 26 ઓગસ્ટના રોજ સવારના 6 થી સાંજના 6 વાગ્યા સુધીમાં 51 તાલુકામાં વરસાદ વરસ્યો છે. 4 તાલુકામાં એક ઇંચથી વધારે વરસાદ જોવા મળ્યો છે. જેમાં કપરાડામાં 2.05 ઇંચ, શુબીરમાં 1.69 ઇંચ, ડાંગ-આહવામાં 1.30 ઇંચ, કાંવટમાં 1.02 ઇંચ વરસાદ વરસ્યો છે. આ સિવાય અન્ય 47 તાલુકામાં 1 થી લઇને 23 મીમી સુધી વરસાદ નોંધાયો છે.
હવામાન વિભાગની આગાહી
હવામાન વિભાગ દ્વારા ગુજરાતમાં આગામી સાત દિવસ ગાજવીજ સાથે હળવાથી સામાન્ય વરસાદની આગાહી કરવામાં આવી છે. આ સાથે 28મી ઓગસ્ટ સુધી માછીમારોને દરિયો ન ખેડવાની ચેતવણી આપવામાં આવી છે. 27મી ઓગસ્ટને બુધવારના રોજ છ જિલ્લામાં ભારે છૂટાછવાયા સ્થળોએ વરસાદની આગાહી છે. છોટાઉદેપુર, નર્મદા, તાપી, ડાંગ, નવસારી, વલસાડમાં યલ્લો એલર્ટ આપવામાં આવ્યું છે. આ સિવાય કોઈપણ જિલ્લામાં કોઈ એલર્ટ જાહેર કરવામાં આવ્યું નથી.
આ પણ વાંચો – સ્વદેશી પર પીએમ મોદીએ કહ્યું – ડોલર હોય કે પાઉન્ડ, પરસેવો મારા દેશવાસીઓનો હોવો જોઈએ
રાજ્યમાં સિઝનનો કુલ 85.04 ટકા વરસાદ
26 ઓગસ્ટ 2025 સુધીમાં રાજ્યમાં સિઝનનો કુલ 85.04 ટકા વરસાદ નોંધાયો છે. જેમાં કચ્છમાં 85.14 ટકા, ઉત્તર ગુજરાતમાં 88.77 ટકા, પૂર્વ મધ્ય ગુજરાતમાં 79.89 ટકા, સૌરાષ્ટ્રમાં 83.72 ટકા અને દક્ષિણ ગુજરાતમાં 88.05 ટકા વરસાદ વરસ્યો છે.
સરદાર સરોવર નર્મદા નિગમ લી. માં 26 ઓગસ્ટને સાંજના 4 વાગ્યા સુધીમાં પાણીનો સંગ્રહ 291751 mcft છે. જે કુલ સંગ્રહ ક્ષમતાના 87.33% જેટલી છે. રાજ્યના અન્ય 206 જળાશયોમાં સંગ્રહ 439386 mcft છે. જે કુલ સંગ્રહ ક્ષમતાના 78.76% છે. 100 ટકા ભરાયેલ ડેમોની સંખ્યા 73 છે. 98 ડેમ હાઇ એલર્ટ પર અને 27 ડેમ એલર્ટ પર છે.
